အကျယ်ချုပ်လွတ်မြောက်ပြီးနောက် ပထမဆုံး ဒေါ်အောင်ဆန်းစုကြည်မွေးနေ့ ကျင်းပ လူပရိတ်သတ်ထောင်ကျော်လာရောက်

မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည် ၈နှစ်တာ အကျယ်ချုပ် ကျခံရပြီးနောက် ပထမဆုံး ကျင်းပသည့် ၆၆ နှစ်မြောက်မွေးနေ့ပွဲသို့ လူပရိတ်သတ် ထောင်ကျော်တက်ရောက်ခဲ့ကြပြီး ဒေါ်အောင်ဆန်းစုကြည်က သူ၏ မွေးနေ့ပွဲတွင် အလိုချင်ဆုံးဆုမှာ တိုင်းပြည်ငြိမ်းချမ်းရေး သာဖြစ်သည်ဟု ပြောကြားခဲ့သည်။
ဒေါ်အောင်ဆန်းစုကြည်က ပြောဆိုရာတွင်
“ယခုအချိန်မှာ ငြိမ်းချမ်းရေးဟာ အရေးအကြီးဆုံး ဖြစ်ပါတယ်။ ဒါကြောင့် ကျွန်မရဲ့မွေးနေ့မှာ ငြိမ်းချမ်းရေးကိစ္စကို အလေးထားပြောချင်ပါတယ်”
ဟုပြောဆိုပြီး တိုင်းပြည်တိုးတက်ဖို့ သာယာဖို့အတွက် ပထမဦးဆုံး လိုအပ်ချက်မှာ ငြိမ်းချမ်းရေးဖြစ်သည်ဟုလည်း ပြောဆိုခဲ့သည်။
ဒေါ်အောင်ဆန်းစုကြည် ငြိမ်းချမ်းရေးကို အဓိကထားပြောဆိုခြင်းသည် ကချင်လက်နက်ကိုင် တပ်ဖွဲ့များနှင့် အစိုးရတပ်အကြား ယခုလက်ရှိ ဖြစ်ပွားနေသည့်တိုက်ပွဲများအား ရည်ညွှန်းလိုခြင်းဖြစ်မည်ဟု ပရိတ်သတ်များထဲမှ တစ်ဦးက ကောက်ချက်ချသည်။
ဒေါ်အောင်ဆန်းစုကြည်က ဆက်လက်ပြီး
“ငြိမ်းချမ်းဖို့ဆိုတာ ကျွန်မတယောက်ထဲ လုပ်လို့မဖြစ်သလို ကျွန်မတို့အဖွဲ့တဖွဲထဲလည်း လုပ်လို့မဖြစ်ပါဘူး” ဟုလည်းထောက်ပြ ပြောဆိုခဲ့သည်။
ဒေါ်အောင်ဆန်းစုကြည်က ဆက်လက်ပြီး
“ငြိမ်းချမ်းရေး သည် အမျိုးသားပြန်လည်ရင်ကြားစေ့ရေး အတွက် ပထမဆုံး ခြေလှမ်းဖြစ်သည်”
ဟုလည်း ပြောဆိုခဲ့သလို သူမ၏ မွေးနေ့ကို မြန်မာနိုင်ငံ အမျိုးသမီးများနေ့ အဖြစ် သတ်မှတ်ထားသည်နှင့် ဆက်စပ်၍လည်း အမျိုးသမီးများမှာငြိမ်းချမ်းရေးကို အမျိုးသားများထက် ပိုပြီးလိုလားသူများ ဖြစ်သည့်အချက်၊ အဘယ်ကြောင့်ဆိုသော် အကြမ်းဖက်မှုနှင့် စစ်မက်ဖြစ်ပွားသည့်အခါ အမျိုးသမီးနှင့် ကလေးငယ်များက အမျိုးသားများထက် ပိုပြီး ဒဏ်ခံရသည့်အကြောင်းကြောင့်ဟုလည်း ထောက်ပြခဲ့သည်။