ခြောက်နှစ်ကြာ အချုပ်အနှောင် ခံခဲ့ရသော အမျိုးသား ဒီမိုကရေစီ အဖွဲ့ချုပ် ဒုဥက္ကဌ ဦးတင်ဦးသည် ယနေ့တွင် နေအိမ် အကျယ်ချုပ်မှ ပြန်လည် လွတ်မြောက်ပြီ ဖြစ်သည်။
နေအိမ်အကျယ်ချုပ် သက်တမ်း (၆) နှစ်ပြည့်သည့် ဖေဖော်ဝါရီ (၁၃ ) ရက်နေ့တွင်လွတ်မြောက်လာခြင်းဖြစ်သည်။
အန်အယ်လ်ဒီ ထိပ်တန်းခေါင်းဆောင်တဦးဖြစ်သူ ဦးတင်ဦးသည် ဒေါ်အောင်ဆန်းစုကြည်နှင့်အတူ ၂၀၀၃ ခုနှစ် မေလတွင် အထက်မြန်မာပြည်သို့ စည်းရုံးရေးခရီးထွက်နေစဉ် စစ်ကိုင်းတိုင်း ဒီပဲယင်းမြို့အနီး ကျည်ရွာတွင် နအဖစစ်အစိုးရကို အားပေးထောက်ခံသူ လူအုပ်ကြီးက ၀ိုင်းဝန်းရိုက်နှက် တိုက်ခိုက်ခံရပြီးနောက် ဒေါ်အောင်ဆန်းစုကြည်နှင့်အတူ ဖမ်းဆီးခံရခြင်း ဖြစ်သည်။
အသက် (၈၃) နှစ်ရှိပြီဖြစ်သည့် အမျိုးသားဒီမိုကရေစီအဖွဲ့ချုပ် ဒုတိယ ဥက္ကဋ္ဌ ဦးတင်ဦးသည် ဗိုလ်ချုပ်ကြီးဟောင်းတဦးလည်း ဖြစ်ပြီး မြန်မာ့တပ်မတော်တွင် ကာကွယ်ရေး ဦးစီးချုပ်အဖြစ် တာဝန်ထမ်းဆောင်ခဲ့ဖူးကာ အများက ချစ်ခင်လေးစားခြင်း ခံရသူဖြစ်သည်။
ဦးတင်ဦး လွတ်မြောက်လာမှုအပေါ် အန်အယ်လ်ဒီ ဗဟိုအလုပ်အမှုဆောင်တဦးဖြစ်သူ ဦးဝင်းတင်က ကြိုဆိုကြောင်း၊ အန်အယ်လ်ဒီအတွက် အင်မတန်ကောင်းမွန်ကြောင်း၊ ထို့ပြင် ဒေါ်အောင်ဆန်းစုကြည် လွတ်မြောက်လာပါက ပိုမိုကောင်းမွန်မည်ဖြစ်ကြောင်း ပြောကြားသည်။
